რევაზ სოხაძე - აჭარაში აქტიურად ვაგრძელებთ მუშაობას სასკოლო ინფრასტრუქტურის გასაუმჯობესებლად

საქართველოს ინფრასტრუქტურის სამინისტროს მუნიციპალური განვითარების ფონდის მიერ ბათუმის №4 და №5 საჯარო სკოლების სრული რეაბილიტაცია დასრულდა. განახლებული სკოლები ახალ სასწავლო წელს ჯამში 2 000 მოსწავლეს მიიღებს.

ახლად რეაბილიტირებული სკოლები საქართველოს პრემიერ-მინისტრმა ირაკლი კობახიძემ, განათლების, მეცნიერებისა და ახალგაზრდობის მინისტრ გივი მიქანაძესთან, ინფრასტრუქტურის მინისტრ რევაზ სოხაძესთან, მუნიციპალური განვითარების ფონდის აღმასრულებელ დირექტორ გიორგი შონიასთან, აჭარის ავტონომიური რესპუბლიკის მთავრობის თავმჯდომარე ზურაბ პატარაძესთან და აჭარის ავტონომიური რესპუბლიკის უმაღლესი საბჭოს თავმჯდომარე ცოტნე ანანიძესთან ერთად დაათვალიერა.

„ძალიან მნიშვნელოვანია, რომ აჭარა კარგად მომზადებული ხვდება ახალ სასწავლო წელს. ბათუმსა და მთლიანად რეგიონში რამდენიმე განახლებული სკოლა გაიხსნა. საქართველოს ინფრასტრუქტურის სამინისტრო, აჭარის მთავრობასთან ერთად, აქტიურად აგრძელებს მუშაობას, რათა რეგიონში სასკოლო ინფრასტრუქტურის მიმართულებით არსებული პრობლემები რაც შეიძლება სწრაფად მოგვარდეს. ვულოცავ ყველა მოსწავლეს, მშობელსა და მასწავლებელს, ვინც ახალ სასწავლო წელს განახლებულ სკოლაში იწყებს და ყველას წარმატებას ვუსურვებ“, — განაცხადა საქართველოს ინფრასტრუქტურის მინისტრმა რევაზ სოხაძემ.

პრემიერ-მინისტრი და მთავრობის წევრები სკოლებში განხორციელებულ ინფრასტრუქტურულ სამუშაოებს გაეცნენ და პედაგოგებსა და მოსწავლეებს სასწავლო წლის განახლებულ გარემოში დაწყება მიულოცეს.

ბათუმის №4 და №5 საჯარო სკოლების რეაბილიტაცია მუნიციპალური განვითარების ფონდმა საქართველოს მთავრობისა და მსოფლიო ბანკის თანადაფინანსებით განახორციელა.

პროექტების ფარგლებში მთლიანად განახლდა სკოლების ინფრასტრუქტურა. თანამედროვე საგანმანათლებლო სტანდარტების შესაბამისად მოეწყო საკლასო და საერთო სივრცეები, სპორტული მოედნები და სკოლის ეზოები; სრულად განახლდა გათბობის, წყალმომარაგებისა და წყალარინების სისტემები.

ორივე სკოლა სრულად არის ადაპტირებული სპეციალური საგანმანათლებლო საჭიროების მქონე მოსწავლეებისთვის.

საქართველოს ინფრასტრუქტურის სამინისტროს მუნიციპალური განვითარების ფონდი აჭარაში საგანმანათლებლო ინფრასტრუქტურის განახლების პროექტებს აგრძელებს. რეგიონში დასრულებულია 3 საჯარო სკოლის რეაბილიტაცია, ხოლო 9 სკოლაში სამუშაოები მიმდინარეობს.

ბათუმში, ზვიად გამსახურდიას ქუჩა №9-ში მდებარე კულტურული მემკვიდრეობის ძეგლზე კონტრაქტორი სამშენებლო კომპანია „საბა კონსთრაქშენის“ მიერ განხორციელებული სამუშაოების შედეგად შენობის ფასადის დაზიანების ფაქტზე მუნიციპალური განვითარების ფონდის მიერ დაუყოვნებლივ დაიწყო მოკვლევა.

ფონდისთვის კატეგორიულად მიუღებელია კულტურული მემკვიდრეობის ძეგლზე ნებისმიერი სახის ჩარევა კანონმდებლობით დადგენილი წესებისა და პროცედურების დარღვევით.

პირველადი მოკვლევის შედეგად, კონტრაქტორ კომპანიას არ გააჩნდა შესაბამისი უფლებამოსილი ორგანოს მიერ გაცემული ნებართვა შენობაზე კონკრეტული სამუშაოების ჩასატარებლად.

მუნიციპალური განვითარების ფონდი ამზადებს ყველა შესაბამის მასალას, რომელიც დაუყოვნებლივ გადაეგზავნება საგამოძიებო ორგანოს შესაძლო სამართალდარღვევის ფაქტზე სათანადო სამართლებრივი შეფასებისა და შესაბამისი რეაგირებისთვის.

პარალელურად, ფონდის ზედამხედველობის სამსახური დეტალურად სწავლობს ობიექტზე არსებულ ვითარებას. შემდგომი სამუშაოები განხორციელდება მხოლოდ შესაბამის უწყებებთან შეთანხმებით და კანონმდებლობით დადგენილი მოთხოვნებისა და პროცედურების სრული დაცვით.

მუნიციპალური განვითარების ფონდისთვის კულტურული მემკვიდრეობის დაცვა უპირობო პრიორიტეტია. ფონდი გამოიყენებს მის ხელთ არსებულ ყველა სამართლებრივ მექანიზმს, რათა დადგინდეს მომხდარზე პასუხისმგებელი პირების პასუხისმგებლობის საკითხი და უზრუნველყოფილი იყოს კულტურული მემკვიდრეობის ძეგლზე შემდგომი სამუშაოების კანონმდებლობის სრული დაცვით განხორციელება.

მუნიციპალური განვითარების ფონდი ჭიათურაში სპორტული ინფრასტრუქტურის განახლების პროექტს იწყებს. შესაბამისი ხელშეკრულება კონკურსში გამარჯვებულ კომპანიასთან გაფორმდა.

პროექტი ითვალისწინებს ამორტიზებული სტადიონის რეკონსტრუქციას UEFA-ს III კატეგორიის სტანდარტების შესაბამისად, ასევე, საცურაო აუზისა და კალათბურთის დარბაზის სრულ რეაბილიტაციას.

არანაკლებ 6000 მაყურებელზე გათვლილ სტადიონზე მოეწყობა განახლებული ტრიბუნები, მედია სივრცე, გასახდელები, სამედიცინო და ფიზიოთერაპიის ოთახები, კომერციული და ადმინისტრაციული ზონები.

ინფრასტრუქტურა აღიჭურვება თანამედროვე ტექნოლოგიების შესაბამისი უსაფრთხოებისა განათებისა სისტემებით.

პროექტის განხორციელება ხელს შეუწყობს ჭიათურაში ჯანსაღი ცხოვრების წესის პოპულარიზაციას, სპორტის განვითარებას და საერთაშორისო დონის სპორტული ღონისძიებების მასპინძლობას.

მუნიციპალური განვითარების ფონდის აღმასრულებელი დირექტორი გიორგი შონია სამტრედიის N11 საჯარო სკოლის სარეაბილიტაციო სამუშაოს ადგილზე გაეცნო.

პირველ ეტაპზე, სკოლის რეაბილიტაციის ფარგლებში, მიმდინარე პროექტირების პროცესის პარალელურად, უკვე დაწყებულია სკოლის რეაბილიტაცია-რეკონსტრუქციის დაწყებამდე აუცილებელი მოსამზადებელი და სადემონტაჟო სამუშაოები.

სამტრედიის N11 საჯარო სკოლა სრულად განახლდება თანამედროვე საგანმანათლებლო სტანდარტების მოთხოვნების შესაბამისად.

პროექტის მიხედვით, მოწესრიგდება შენობის ძირითადი ინფრასტრუქტურა, რეაბილიტაცია ჩაუტარდება სასწავლო და ადმინისტრაციულ სივრცეებს, გაუმჯობესდება საინჟინრო კომუნიკაციები და შეიქმნება მოსწავლეების საჭიროებებზე მორგებული უსაფრთხო გარემო.

მუნიციპალური განვითარების ფონდის აღმასრულებელი დირექტორი, გიორგი შონია მსოფლიოში ერთ-ერთი უმსხვილესი და ინოვაციური არქიტექტურული კომპანიის Gensler-ის სტუდიის დირექტორს, რობერტ იეკელისს და დიზაინის მენეჯერს, ნადია ვოლჩანსკის კომპანია „ დემარკის” ერთ-ერთ დამფუძნებელთან, ალექსანდრე კაციტაძესთან ერთად შეხვდა.

შეხვედრის მონაწილეებმა განიხილეს ქუთაისის მრავალფუნქციური სპორტის სასახლის პროექტირების პროცესი.

1965 წელს დაარსებული ამერიკული კომპანია Gensler საქართველოში პირველ — ქუთაისის სპორტის სასახლის პროექტს ქართულ კომპანია „დემარკთან" ერთად ახორციელებს.

Gensler-ის ფილოსოფია ეფუძნება ადამიანზე ორიენტირებულ მიდგომას, მდგრადობასა და ტექნოლოგიურ ინოვაციებს. კომპანიის პროექტები კი, მათ შორის, Moody Centre Basketball and Events Area (აშშ), YOFC სათავო ოფისი (ჩინეთი), Adobe Founders Tower (აშშ) აღიარებულია თანამედროვე არქიტექტურის სიმბოლოდ.

ქუთაისის სპორტის სასახლის პროექტირება დასკვნით ეტაპზეა. საპროექტო დოკუმენტაციის მომზადებაში ამერიკული კომპანიის აქტიური ჩართულობა უზრუნველყოფს მრავალფუნქციური სპორტული ინფრასტრუქტურის საერთაშორისო სტანდარტების სრული დაცვით აშენებას.

პროექტი ითვალისწინებს 5 000 მაყურებელზე გათვლილ, თანამედროვე სპორტის სასახლეში მთავარი და სათადარიგო დარბაზების, სატრენაჟორო სივრცის, აუზის, მსაჯებისა და დოპინგ-კონტროლის ოთახების მოწყობას.

გარდა ამისა, ტერიტორიაზე უნდა განთავსდეს საკონფერენციო დარბაზი, პრესის სამუშაო სივრცე, საერთაშორისო დელეგაციების ოთახები, სპორტული მაღაზია და კაფეტერია.

ასევე, მოეწყობა 350 ადგილიანი ავტოსადგომი, რეკრეაციული ზონები, გზები და ბილიკები.

ქუთაისის სპორტის სასახლის შენობა სრულად იქნება ადაპტირებული განსაკუთრებული საჭიროებების მქონე პირებისთვის.

პროექტის განხორციელება მნიშვნელოვნად გაზრდის ქალაქის შესაძლებლობას უმასპინძლოს საერთაშორისო დონის სპორტულ, კულტურულ და გასართობ ღონისძიებებს, რაც ხელს შეუწყობს ტურიზმის განვითარებას და ადგილობრივი ეკონომიკის გაძლიერებას.

ინფრასტრუქტურის სამინისტროს მუნიციპალურმა განვითარების ფონდმა ყვარლის კულტურის სახლის (თეატრის) რეაბილიტაციის პროექტირებისთვის განმეორებითი კონკურსი გამოაცხადა

ყვარლის კულტურის სახლის შენობა გასული საუკუნის 60–70-იან წლებშია აშენებული და საბჭოთა პერიოდის საზოგადოებრივი არქიტექტურის ერთ-ერთ ტიპურ ნიმუშს წარმოადგენს. რეაბილიტაციის პროექტის მიზანია შენობის არქიტექტურულ-მხატვრული ღირებულებების შენარჩუნება და მისი სრულყოფილი რეაბილიტაცია, ფუნქციური შესაძლებლობების გაუმჯობესება და თანამედროვე, მრავალფუნქციურ კულტურულ ცენტრად გარდაქმნა.

საპროექტო დავალების ფარგლებში შემუშავდება შენობის რეაბილიტაცია-ადაპტაციის სრული პროექტი და შესაბამისი სახარჯთაღრიცხვო დოკუმენტაცია. გათვალისწინებულია სივრცეების ოპტიმიზაცია, მრავალფუნქციური საკონცერტო დარბაზის, სასწავლო-საგანმანათლებლო სივრცეების, ფოლკლორული, ქორეოგრაფიული და საესტრადო ანსამბლებისთვის განკუთვნილი ოთახების, ასევე საგამოფენო სივრცის მოწყობა.

განახლების შედეგად ყვარლის კულტურის სახლი თანამედროვე ინფრასტრუქტურის მქონე კულტურულ ცენტრად ჩამოყალიბდება, რომელიც ადგილობრივ მოსახლეობასა და სტუმრებს მრავალფეროვანი კულტურული, საგანმანათლებლო და საზოგადოებრივი ღონისძიებების ჩატარების შესაძლებლობას შესთავაზებს.