მუნიციპალური განვითარების ფონდის განცხადება

8 მაისი 2022

 გვსურს გამოვეხმაუროთ ერთ-ერთი ტელეკომპანიის მიერ მორიგ ცილისმწამებლურ სიუჟეტს, რომლის ერთადერთი მიზანი გადაუმოწმებელი და არასრული ინფორმაციის გავრცელებით საზოგადოების შეცდომაში შეყვანა და წარმატებით მიმდინარე სახელმწიფო პროგრამა „განახლებული რეგიონების“ შესახებ უარყოფითი დამოკიდებულების შექმნაა.

პროგრამის "განახლებული რეგიონები" პირველი ეტაპით დაფინანსებილი პროექტები დასკვნით ფაზაშია. რაც შეეხება პროგრამის მეორე ეტაპით  განსახორციელებელ პროექტს, რეაბილიტაცია უტარდება არა მხოლოდ დედოფლისწყაროში არსებულ შინმოუსვლელთა მემორიალს, არამედ მემორიალის მიმდებარე 11 ჰექტარ ტერიტორიაზე იგეგმება რეკრეაციული, დასასვენებელი პარკის მოწყობა. დაგეგმილი სამუშაოები მოიცავს წლების წინ არსებული ტბის აღდგენას; ტერიტორიაზე  ბავშვთა გასართობი მოედნებისა და სპორტული სივრცეების, კვების ობიექტების, ველობილიკის, ფანჩატურებისა და სხვა საჭირო ინფრასტრუქტურის მოწყობას. გარდა ამისა, მთელ ტერიტორიაზე დაგეგმილია ახალი ხე-მცენარეების დარგვა და მათი მოვლა-პატრონობისთვის აუცილებელი სარწყავი სისტემისა და წყლის რეზერვუარების მოწყობა; ასევე განათების, ელექტროენერგიის, გაზისა და ინტერნეტის კომუნიკაციების მონტაჟი.

2021 წელს დაწყებული სახელმწიფო პროგრამა „განახლებული რეგიონები“ მიზნობრივი პროგრამაა და მისი მთავარი ამოცანა ქვეყნის მუნიციპალიტეტების ურბანული განახლებაა. ურბანული განახლება მოიცავს ისეთ პროექტებს, როგორიცაა მნიშვნელოვანი კულტურული თუ ისტორიული მემკვიდრეობის ობიექტების და მუნიციპალიტეტების ადმინისტრაციული ცენტრების  რეაბილიტაცია, რეკრეაციული სივრცეების მოწყობა და რეკრეაციულ პარკებში შესაბამისი ტურისტული ინფრასტრუქტურის განვითარება, მუნიციპალიტეტისათვის მნიშვნელოვანი საზოგადოებრივი ობიექტების მშენებლობა, ქალაქებისა და დასახლებების ურბანული განახლების საპროექტო  დოკუმენტების შემუშავება.

პროგრამა მოიცავს საქართველოს 63 მუნიციპალიტეტს და პროგრამის პირველი ეტაპის ფარგლებში მიმდინარე პროექტების დიდი ნაწილი უკვე დასდრულების ფაზაშია.

მნიშვნელოვანია, რომ პროგრამით დასაფინანსებელ პროექტების შერჩევა ხდება მუნიციპალიტეტების მიერ განსაზღვრული საჭიროებების მიხედვით. სპეციალური კომისიის შემადგენლობაში, რომელიც პროგრამით დასაფინანსებელ პროექტებს არჩევს, შედიან ადგილობრივი ხელსუფლების წარმომადგენლები.

 

პროგრამის „განახლებული რეგიონები“  მიზანია ქვეყნის რეგიონებში ადგილობრივი მოსახლეობისათვის სოციალური გარემოს გაუმჯობესება და ახალი მიზიდულობის ცენტრების გაჩენა.

რეგიონების განვითარებისათვის, ამ პროგრამის მიღმა, არაერთი პროექტი ხორციელდება ქვეყნის ყველა რეგიონში. მათ შორისაა, ქალაქ დედოფლისწყაროსა და დედოფლისწყაროს მუნიციპალიტეტის 14 სოფლის (ხორნაბუჯის, სამრეკლოს, ფიროსმანის, სამთაწყაროს, თავწყაროს, ჭოეთის, საბათლოს, ზემო ქედის, ქვემო ქედის, არხილოსკალოს, გამარჯვების, არბოშიკის, ზემო მაჩხაანის და მირზაანის)  უწყვეტი წყალმომარაგებისთვის 58 მილიონი ლარის პროექტები.  სამშენებლო სამუშაოებს აქტიურად მიმდინარეობს და ეტაპობრივად 2023 წლის ბოლოსთვის დასრულდება, რის შედეგჰადაც, დედოფლისწყაროსა და მისი 14 სოფელის 21 000 ბენეფიციარს 24 საათიანი წყალმომარაგება პირველად ექნება. პროექტს საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია ახორციელებს.